როგორ გავაუმჯობესოთ პრეზენტაციის უნარები

ფორბსის მონაცემებით გამოკითხულთა 70% ამბობს, რომ პრეზენტაციის უნარი კრიტიკულად მნიშვნელოვანია კარიერული წარმატების მისაღწევად.

ეფექტური პრეზენტაციები არ არის მხოლოდ ინფორმაციის გადაცემა,  ის მოიცავს ემოციების მართვას, აუდიტორიის ყურადღების მიქცევას, ინტერესის შენარჩუნებას და საჭირო შეტყობინების ეფექტურად გადაცემას.

რატომ არის პრეზენტაციის კარგი უნარები მნიშვნელოვანი?

ახალი პოტენციური კლიენტის დარწმუნებიდან დაწყებული, თქვენი ცოდნის გაზიარებით დამთავრებული, პრეზენტაცია დაგეხმარებათ თქვენი მთავარი იდეები და მოსაზრებები დიდი აუდიტორიის წინაშე წარადგინოთ.

თუმცა, მნიშვნელოვანია ის, თუ როგორ წარადგენთ ამ ინფორმაციას.

პრეზენტაცია უნარია, რომლის გაუმჯობესება შესაძლებელია დროთა განმავლობაში, ვარჯიშითა და ახალი ტექნიკების გაცნობიერებით. თუ გსურთ დაიწყოთ ეფექტური პრეზენტაციის უნარების განვითარება, ეს პრაქტიკული რჩევები დაგეხმარებათ

კარგად მოემზადეთ და შეისწავლეთ თემა 

პრეზენტაციისთვის მომზადების ეტაპი უმნიშვნელოვანესია, პრეზენტატორის წარმატება მნიშვნელოვნად არის დამოკიდებული გადაცემული ინფორმაციის ხარისზე, პრეზენტატორის ცოდნასა და  მომზადების დონეზე.

შეისწავლეთ აუდიტორია 

პრეზენტაციის უნარების გაუმჯობესების პირველი ნაბიჯი, მომზადებასთან ერთად არის სამიზნე აუდიტორიის გათვალისწინება. ეს განსაზღვრავს თქვენი პრეზენტაციის ტიპს. მაგალითად, პრეზენტაცია უნივერსიტეტის სტუდენტების ჯგუფისთვის ძალიან განსხვავებულ მიდგომას საჭიროებს, ვიდრე ბიზნეს პრეზენტაცია თქვენი კომპანიის ხელმძღვანელისთვის. თქვენი სათქმელი, მისი გადმოცემის ფორმა და დეტალების დონე უნდა შეესაბამებოდეს თქვენს სამიზნე აუდიტორიას.

სწორად განსაზღვრეთ პრეზენტაციის დრო 

ძალიან ხანგრძლივმა პრეზენტაციამ შეიძლება აუდიტორია დაღალოს და მათი ყურადღება გაფანტოს. სწორი ხანგრძლივობის პრეზენტაცია უზრუნველყოფს, რომ თქვენ მოახერხოთ მნიშვნელოვანი ინფორმაციის მიწოდება ისე, რომ აუდიტორია ჩართული დარჩეს

შექმენით პრეზენტაციის კარგი სტრუქტურა

შესანიშნავი იდეაც კი ვერ მიიზიდავს აუდიტორიას, თუ ის არ იქნება საინტერესო და დინამიკური. პრეზენტაციის ეფექტური სტრუქტურა მოიცავს მკაფიო, ლოგიკურად ურთიერთდაკავშირებულ ნაწილებს, რაც აუდიტორიას დაეხმარება ინფორმაციის გაგებაში და ინტერესის შენარჩუნებაში.

სტრუქტურა უნდა შედგებოდეს შემდეგი ძირითადი ნაწილებისგან:

1. შესავალი

შესავალი არის ის ნაწილი, რომლის დროსაც აუდიტორიაზე ახდენთ პირველ შთაბეჭდილებას და რომელიც განსაზღვრავს, რამდენად ჩაერთვება აუდიტორია. დაიწყეთ გაცნობით და ყურადღების მიმქცევი ელემენტით, საინტერესო სტატისტიკით ან კითხვის დასმით, შემდეგ განუმარტეთ აუდიტორიას, რას უნდა ელოდონ (მოკლე მიმოხილვა ძირითადი პუნქტების შესახებ). 

2. ძირითადი ნაწილი

სექციებად დაყოფა: გამოიყენეთ ქვე-სათაურები ან ნომრიანი ჩამონათვალი, რაც აუდიტორიას დაეხმარება კონტექსტის გააზრებაში

იდეების გადმოცემა: თითოეული პუნქტი შეავსეთ: მაგალითებით, ვიზუალური მასალით: გრაფიკები, სურათები

სწორი თანმიმდევრობა: ეცადეთ ქვესათაურები ლოგიკურად იყოს ერთმანეთთან დაკავშირებული 

3. დასკვნა

ამ ეტაპზე ხდება მთავარი პუნქტების შეჯამება და კითხვა-პასუხის რეჟიმი, თუმცა პრეზენტაციის სპეციფიკიდან გამომდინარე შესაძლებელია კითხვა-პასუხის რეჟიმი პრეზენტაციის პროცესშივე გქონდეთ და არ დაელოდოთ დასრულებას.

პრეზენტაციის სლაიდებზე ინფორმაცია მარტივად და მოკლედ ჩამოაყალიბეთ 

პრეზენტაციის დამხმარე სლაიდები, როგორიცაა PowerPoint, შეიძლება იყოს ძალიან სასარგებლო.თუმცა, ნუ დაამატებთ ზედმეტ ინფორმაციას სლაიდებზე, ეცადეთ ტექსტი იყოს მაქსიმალაურად ლაკონური და ვიზუალი ლამაზი.

მართეთ თქვენი ემოციები

პრეზენტაციის ჩატარებას უმრავლეს შემთვევაში თან ახლავს ნერვიულობა, კარგი აბავი ის არის, რომ ნერვიულობა გრძელდება მხოლოდ რამოდენიმე წუთი - დასაწყისში. ნერვიულობის შემცირებაში დაგეხმარებათ კარგი მომზადება და თემის ცოდნა, ტექნიკის წინასწარ გატესტვა, იმ სივრცის შესწავლა, სადაც ატარებთ პრეზენტაციას, რეპეტიციის გავლა, აუდიტორიის შესწავლა, გაცნობით, საინტერესო გამხსნელი ფრაზით ან კითხვით დაწყება.

მართეთ თქვენი ხმის ტემბრი

ერთ-ერთი ყველაზე გავრცელებული შეცდომა პრეზენტაციის დროს არის ძალიან სწრაფად ან ჩუმადსაუბარი. საუბრის ტემპი აჩვენებს, რამდენად თავდაჯერებული ხართ როგორც საკუთარ თავში, ისეიმ თემაში, რომლის შესახებაც საუბრობთ.

გამოიყენეთ გახსნილი და მეგობრული სხეულის ენა 

გახსნილი და მეგობრული სხეულის ენაშესანიშნავი დასაწყისია. წინასწარ შეისწავლეთ თქვენი სხეულის ენა და ეცადეთ სწორად მართოთ პრეზენტაციის დროს, მოერიდეთ ძალიან აქტიურ ან ჩაკეტილ სხეულის ენას.

შეხედეთ აუდიტორიას თვალებში 

ეს აჩვენებს, რომ თქვენ ჩართულები ხართ და კონკრეტულად მათ ესაუბრებით.

თავი აარიდეთ "შემავსებელ” ფრაზებს 

პრეზენტაციის დროს „შემავსებელი“ ფრაზების (მაგალითად, „ეემ“, „აა“, „ისა, “ანუ” და სხვა) გამოყენება შეიძლება უარყოფითად აისახოს თქვენი გადაცემული ინფორმაციის აღქმაზე. ეს სიტყვები ხშირად მიუთითებს მოუმზადებლობაზე ან ნერვიულობაზე.

ვარჯიში, ვარჯიში, ვარჯიში!

პრეზენტაციის უნარების გაუმჯობესების უმარტივესი გზა ვარჯიშია. შეგიძლიათ ივარჯიშოთ მარტომ სარკის წინ, რაც, შესაძლოა, ოდნავ უხერხული იყოს, მაგრამ დაგეხმარებათ გაარკვიოთ, რა გამოგდით კარგად და რა მოითხოვს გაუმჯობესებას.

ასევე, სცადეთ ვარჯიში მეგობრების მცირე ჯგუფის ან ვიდეოკამერის წინაშე.

უბრალოდ დატკბით თქვენი პრეზენტაციით 

ყველაზე მნიშვნელოვანი რჩევა: დატკბით თქვენი პრეზენტაციით, თქვენი ემოციები გადამდებია აუდიტორიისთვისაც, თემა რომელზეც სიამოვნებით საუბრობთ, სასიამოვნო მოსასმენია მსმენელისთვისაც.